Auszug aus Berthold von Regensburgs Predigt: »Von zehen koeren und der engele unde der kristenheit« Der almehtige got helfe mir mit der gnâden, daz dise niun koere behalten werden; wan der zehende kôr ist eht gar von uns gefallen und aptrünnic worden. Daz sint die gumpelliute, gîger unde tambûrer, swie die geheizen sîn, alle die guot für êre nement. Sie solten den zehenden kôr geordent haben; nû sint sie uns aptrünnig worden mit ir trügenheit. Wan er ret eime daz beste daz er kân die wîle daz erz hoeret, und als er im den rücken kêret, sô ret er im daz boeste, daz er iemer mê kan oder mac, unde schiltet manigen, der gote ein gerehter man ist und ouch der werlte, unde lobet einen, der gote und der werlte schedelichen lebet. Wan allez ir leben habent sie niwan nâch sünden unde nâch schanden gerihtet unde schament sich deheiner sünden noch schanden. Unde daz den tiuvel versmâhet ze rede daz redest dû, und allez daz der tiuvel in dich geschütten mac, daz laezest dû allez vallen ûz dinem munde. Owê, daz ie dehein touf ûf dich quam! wie dû des toufes unde kristentuomes verloukent hâst! Und allez daz man dir gît, daz gît man dir mit sünden; wan sie müezent gote dar umbe antwürten an dem jungesten tage die dir gebeut. Alsô, gît man dirz mit sünden, und alsô enpfaehest dû ez mit sünden und ouch mit schanden. Wol hin, ob dû iendert hie bist! wan dû bist uns abtrünnic worden mit schalkeit unde leckerîe, unde dâ von solt dû ze dinen genôzen, den aptrünnigen tiuveln, wan dû heizest nâch den tiuveln unde bist halt nâch in genennet. Dû heizest Lasterbale, sô heizet dîn geselle Schandolf. Sô heizet Hagedorn, sô heizet der Hellefiwer, sô heizet der Hagelstein. Alsô hâstu manigen lasterbaeren namen als din gesellen, die tiuvele, die aptrünnic sint.